UL ferdig for denne gong

Ja, då var UL, årets høgdepunkt, over. Det vart visst tre komma i førre setning, men det får du berre leve med. Dagane gjekk så utruleg fort og før eg visste ordet av det var det blitt både laurdag og søndag, og då måtte alle diverre reise kvart til sitt. Det var så mange hødepunkt at eg orkar ikkje skrive omfattande om dei alle. Det å få treffe vener og få nye vener er alltid kjekt, men likevel slår det ikkje møtene som var der. Lovsongen, talane, vitnespyrda, (innslaget til KREKO, haha), forbønn og alt det andre. Sterkt, inspirerande, oppbyggjande og bunnsolid. UL er berre heilt konge!

I dag hadde eg ein ganske rar dag. Det var altså avreisedag frå UL, men sidan UL var så Askøy var det ikkje lange vegen heim, så det var ikkje noko stress for meg å kunne ta det litt med ro og sove lenge. Likevel klarte eg ikkje å sova lenger enn til 12 (eg la meg kl 4) fordi eg var heilt sikker på at dei kom til å hive oss ut etter kvart for å låse skulen der vi sov. Det trengte eg ikkje å bekymre meg for, så eg gjekk og dusja og prøvde å slå ihjel litt tid med det. Etterpå hadde alle reist utanom meg, så eg gjekk og sulla rundt og bestemte meg for å gå og kjøpe kebab, og så gjorde eg det. Dagen før hadde eg avtalt med ein at han skulle køyre meg heim, men eg hadde ikkje peiling på kor tid vi skulle reise berre at det var før kl 16.30. Eg hadde heller ikkje batteri på mobilen og kunne ikkje finne meir eksakt tidspunkt. Me det kjøpte eg meg kebab og så var det berre å setje seg ned kl 14.00 og sjå kor tid bilen dukka opp. Det var enno godt eg ikkje satsa på at sjåføren ville kome kl 16.30 for han møtte opp 14.15. Godt var det for då slapp eg å sitje og vente i 2.5 time på ein heilt tom skule utan batteri på korkje mp3-spelar eller mobiltelefon.
Så altså, i dag har eg opplevd å sulle døgvill rundt på Askøy med kebab i handa og bagasjen ved sidan av meg på graset. Artig.

Forresten, no har eg opplevd å sove utan liggjeunderlag på golv. Eg gløymte nemleg liggjeunderlag og måtte med det sove rett på golvet. Det gjekk eigentleg heilt greitt. Ja, eg er herpa i ryggen men ein må ikkje hengje seg opp i bagatellar.

Eg har funne ut at eg er veldig nøye på grammatikk og sånt, men eg veit ikkje korleis grammatikk stavast. Stavast det grammatikk eller gramatikk? Hmm.. Det skal ikkje vere enkelt.

Ein ting eg hatar ved meg sjølv er at eg alltid gløymer å ta bilete. Til dømes no på UL tok eg berre 2 bilete og det er jo rett og slett berre heilt patetisk. Eg er så DUM!!! ARG!!! Men men, no kan eg ikkje gjere noko med det.

To dagar på rad

No har eg faktisk skrive blogg to dagar på rad, etter eg har skrive dette ferdig altså. Det må nesten vere ny rekord.
I dag var eg på jobb igjen etter å ha hatt fri ein dag. Dagen gjekk ganske fort eigentleg sjølv om eg dreiv med akkurat det same eg gjer kvar gong eg er på jobb. Nokon tykkjer det høyres kjedeleg ut å leggje papir i alfabetisk rekkjefølgje og etterpå leggje det i rett mappe, men eg tykkjer det er heilt greitt. Det er nesten litt avkopling, for ein sit berre og gjer den same rørsla heile tida, og då kan tankane berre flyte. I dag tenkte eg mykje på det faktum at eg skal leie Sygnakoret til neste år. Det blir utfordrande, spanande, skummelt meg òg kanskje litt morosamt. Eg har bestemt meg for èin song vi skal ha, og den er tatt frå Kongshaug sin musikal "Kva er då eit menneske". Eg tykkjer i alle fall at den er veldig fin (og ikkje så alt for vanskeleg), så vi får sjå korleis det blir.
Etter eg hadde vore på jobb reiste familien opp til tante og onkel på Seim og grilla. Det var ganske koseleg, men eg var der ikkje så lenge før eg reiste ned att. Eigentleg hadde eg tenkt å jogge eller noko sånt, men Stine ville heller sjå film og eg lot ho påverke meg. Trass alt, eg trente i går, så det er ikkje så gale. Kan heller ta det att i morgon. Ho skulle eigentleg ha kome ned for lenge sida, men det tar litt tid med Stine, sånn er det berre.
No går eg og spelar litt piano.

Nada

No for tida føler eg ikkje at eg har noko å skriva om her på bloggen min. Det er trass alt ferie, så det skjer ikkje så alt for mykje. Eigentleg er det lygn av meg å skriva dette her, for det har faktisk skjedd ganske mykje i det siste.
For om lag 2 (?) veker sidan var eg på Sommartreff og var leder der. Det var i grunn ganske så kjekt, så eg kan sei at eg koste meg der sjølv om det til tider var ganske slitsamt. Deretter reiste eg rett derifrå til generalforsamlinga til Norsk Luthersk Misjonssamband, populært kalla GF til NLM, mest populært kalla GF.
På GF var det masse folk, til og med masse sygnafolk, og det var grådig kjekt. Eg og Ragnhild Sofie budde på Rødde fhs (GF var i Trondheim), og med det lata vi på ein måte som om vi gjekk på Kongshaug. Vi var litt sånn wannabe-Kongshaug utan at vi ville det, og det var fordi vi måtte ta bussen med dei og sånt. Men eg trur ikkje folk hatar oss fordetom. R.S sang på tre møter og det gjekk veldig bra. Ho er så flink, ho er nesten litt kjendis, og eg er stolt av å vere venninna hennar, men det hadde eg no forresten vore uansett. Eg vart intervjua på eit av ungdomsmøta om kva det vil seie å ta Gud på alvor, og eg følte at eg klarte å få fram poenget mitt. Rart at det sat fleire tusen folk der, for eg såg berre om lag 40 folk, så det var ikkje så skummelt. Den kvelden sat eg faktisk òg backstage med SUM, og det var stas. Dei er så flinke! Dei er superflinke! Eg likar SUM :)
I dag har eg vore med Stine, noko som alltid er kjekt. Vi gjekk på lang tur i sikkert tre timar, og eg vart fekk faktisk skilje frå singleten og shortsen. Seinare i dag veit eg ikkje kva som skjer. Eg skal på jobb i morgon, så eg må nok sove vekk sumarnatta, noko som er heilt greitt sidan eg har sove så alt for lite i det siste. Eg treng å sova rett og slett.
Akkurat no kunne eg tenkt meg å reise tilbake til Sygna, berre å reise tilbake til rommet mitt der faktisk. Når vi snakkar om rom, så har eg bestemt meg om å få litt meir elektronikk/Hi-Fi på rommet mitt no til hausten. Eg har jo eit gedigent anlegg på storleik med Keiko, og no har eg kjøpt meg DVD-spelar. Berre for å nemne det er eg den første i min familie som har kjøpt seg DVD-speler, og no gler eg meg til å sjå masse filmar. Eg har nemleg ein del filmsjåing å ta att sidan eg vaks opp utan VHS eller DVD-spelar. Har eg traumar? Ikkje i det heile. Sidan eg no har eg kjøpt meg DVD- spelar har eg tenkt å få tak i ein TV, anten på søppelfyllinga (det er utruleg mange godt brukbare fjernsyn som blir dumpa der) eller i butikken. I tillegg skal eg kjøpe meg ein liten snerten 13" MacBook, kvit vel å merke, som eg trur eg kjem til å ha mykje glede av.
Eg hadde visst ein del å skrive ja.. Men no skal eg på do, så eg gidd ikkje skrive meir.